Es Dräumli wird wohr... Am 19. Januar 1962, also vor meh als 40 Joohr, hei sich 8 Persone zur erschte provisorische Fasnachtsversammlig troffe und am 5. Mai het denn, mit 21 Mitglider, d Gründigsversammlig stattgfunde. Bis zu dem Zytpunkt hett me in Thürne d Fasnacht gar nid richtig kennt, d Beize hei gschlosse und me het au kei einzigi Maske im Dorf gseh. Mit emene Leiterwage gschmückt mit Tannezwyg, Röseli und gfüllt mit Mimose, Orange und Konfetti si die Lüt am Fasnachtssunntig denn uff Sissech an Umzug gange. Am Zyschtig isch denn dr grossi Fasnachtsplausch im Dorf über d Bühni gange und mit de Schnitzelbängg hett me dr nötig Bazze verdient.
Eso eifach, so glatt und so schlicht isch d Fasnachtsgsellschaft Aerdwybli Thürne entstande. Vo Johr zu Johr sinn mehr Lüt und mehr Programm derzue cho. 1965 hett me denn e Waage baut mit richtige Wändli, wo me Schriftzüg etc. hett chönne läse; au d Lieschtler hei sich ab de Thürner chönne erfreue. 1967 hei eusi Waggis denn ändlich mol neui Koschtüm bicho, rot/schwarz karierti Hemli. 1968 hett denn au serscht Mol e Morgestreich am Mäntig und am Zyschtig dr Chindernomidag stattgfunde.
1970 jetzt gits ändlich au e Guggemuusig, denn vo dene 14 Chnöche hei jo au 5 Musikverein Erfahrig kha. "D Aerdwybli-Schraenzer" - si gebore worde. 1974 hett me serscht mol us Polyeschter Larve gmacht und in dem Joohr hett me zuedäm versuecht e "alti Garde" z'gründe, doch d Begeischterig hett sich in Gränze ghalte. In dem Joohr isch me usem Rössli ab sofort verbannt worde (schins heig me chli zwild doh) also hett me im 1975 serscht mol in d'Turnhalle müesse wiche. Dört isch denn dr Maskeball über d Bühni. 1976: es schrecklichs Johr niemerts hett mitgmacht, doch schliesslich hei noh e paar Agfrässeni öbbis ufgstellt. 1977 hetts denn grad 2 Wääge geh und au dr Rössliwirt hett wieder d'Türe ufdo. 1978 hei 24 Schränzer wieder agfange (nach 2 Joohr Unterbruch). Vo Johr zu Johr isch d Guggemusig grösser und grösser und au besser worde, au e Tambourmajor hett me kha und s'erscht Mol in dr Gschicht vo dr FGT isch 1979 e Blagette usegäh worde.
Me cha säge, dass mir jetzt sit dä 80er Joohre, immer e gueti Gruppe zämme kha hei. Mol viel Lüt mol weniger Lüt, aber d'Hauptsach isch jo dr Spass am Ganze. Im Joohr 1980 isch denn au serscht mol am Sunntig e Latärneumzug gmacht worde und als Höhepunkt hett me denn s Fasnachtsfüür azunde, hejo dänk zum dr Winter ustribe. Und noh e Höhepunkt: s'erscht mol in Thürne hett me e eigeni Schnitzelbangg-Gruppe ins Läbe gruefe - d Fenschtrgucker.1983 hei mir in Thürne s Dorffescht kha und natürlich hett au d Fasnachtsgsellschaft e Beizli kha. Gäld, jä wie isch denn au e rächte Bazze in d FGT gströmt? Dä Gedanke-Stoos het d Fasnachtsgsellschaft veralasst es Grümpelturnier durezführe. Ganzi 19 Mannschafte in 4 Kategorie hei um d Pokal kämpft "gschuttet". Wells eso e Rieseplausch gsi isch, hett me beschlosse, das es vo jetzt ah jedes Joohr im Herbscht zmache.
1987 - "25 Joohr Aerdwybli Thürne" und als Motto für d Fasnacht hett me au grad s Aerdwybli gnoh, me hett au es Büechli mit dr Vereinsgschicht loh drucke und au e Video isch erstellt worde (natürlich isch au bim Hauptschauplatz im Aerdwybliloch dreiht worde). 25 Rugger hei mitgmacht; Aktivi hetts über 50 Fasnächtler kha. So isch das witergange vo Joohr zu Joohr isch au d Guggä stärker (musikalischer) worde, mir hei au immer meh Ufftritt kha und eusi Stückli dörfe präsentiere.
S Grümpelturnier hett usdient kha und me hett e neui Gäldquelle müese sueche. Alässlich vo eusem 35 jööhrige Jubiläum im 1997 hett me afangs 96 dänkt - mir möche es Jubiläumsguggefescht - s "Guggefestival" isch gebore worde. 5 OK-Mitglieder hei e grossi und publikumsbegeischtärti Sach uff d'Bei gstellt. Und das Guggefestival hett bis jetzt jedes Joohr immer ändi November statt gfunde. Me cha so säge, ohni das Fescht chönnte mir in däm Rahme gar nümm exischtiere.
Im 1995 isch jo au noh e Pfiffergruppe zur Fasnachtsgsellschaft derzue cho. Eusi Aerdwybli-Pfiffer si denn serscht mol im 97 mitgloffe am Umzug. Mir si am Umzug Sissach di gröschti FGT. Mit dä Bingis, dr Waggisgruppe, dr alte Garde, dä Pfiffer und natürlich dr Gugge hei mir e sehr grosse Bandi.
Apropos Gugge vo dere hani eigentlich am wenigschte verzellt bis jetzt. I würd säge in de Joohre vo 95-99 hei mir e grandiosi Teilnehmerzahl kha, immer öppe 35 Rugger. Aber au bi eus hei e paar uffghört oder hei kei Zyt meh in d Gugge chönne investiere. An dr Fasnecht 2002 sis 34 gseh! Super, denn mir hei au in letschter Zyt rächt viel Uswärtigi derzue bicho und au endlich wieder mol e paar jungi Thürner. Zu de Sujets muess meh noh eis säge, bis uff einige Ussnahme; d Aerdwybli-Schränzer sinn immer eini vo dä schönschte Guggene. Dänke mir numme emol zrugg an euses 35 jööhrige Jubiläum wo mir e fantastische Waggischopf bicho hei. I glaub uff dä isch jede sehr stolz, wo dört scho grugget hett. Oder zum Bispil an euses Alien vom Millenium-Joohr 2000, wow do hei denn alli rächt gstuunt, obwohl e Rock einige nid so passt het. Lieder - jä d'Lieder si so e Sach bi eus - dä eine gfalle si, de andere nid.... I glaub das isch normal, doh einigi Bispil vo Lieder wo mir in dr Gugge "sensationell" spiele: Eusi Hymne - Wahnsinn, dr Nasa, Rock it all over the world, Runnaway, Hymn, Proud Mary usw. Mir hei im Gsamte sicher öppe 22 Lieder zur Uswahl, wobi dere ca. 8 zum Marschrepetoir ghöre. Lüt - mir dörfe glaub reglich stolz uff eus si, denn usser amigs chleinere Komplikatione verstönde sich alli rächt guet. Dr Altersunterschied isch gross, aber s'isch guet eso wies isch, denn die Ältere luege zu de Jüngere in dr Gugge (mängisch au umgekehrt).
Bis do ahne isch Gschicht bis 2001. Doch in de kommende Joohr hei sich noh ganz viel anderi und neui Sache ergeh. Mir unternehme sehr viel zämme, wenn mr do numme mol an eusi Summerprobe, Altjohreshock, Carneval of Spain oder Taufi vo de Neue dänke... Bi eus isch immer öbis los! Impressione in Bild findet me unter em Menupunkt "Photos". Nach der Fasnacht 2003 hei mir denne e neui CD uffgnoh. Anstatt e Bummel si mr denne 2 Dääg im Tonstudio gsi. Mir hei krampft, presst, gschlage, churz um alles geh! Sie isch dr Hammer die CD! Me cha se bi eus bezieh und uff dr HP sogar Usschnitt aloose.Im Joohr 2004 isch die letschti Fasnacht für unsere langjöhrige Gugge-Chef dr Beat Gisin gsi. Mer hei die Wuche in volle Züg nomol gnosse und d Stimmig isch wunderschön gsi i eusere grosse Familie. Am letschte Uftritt am Cheerusball in Buckte hett dr Beat sis Zepter an's Rahel Ebneter übergeh, wo sit denn di musikalischi Leiterin vo eusem Verein isch.
Aktuell sind mer 40 Aktivmitglieder. Bi eus stoht s Zwüschemenschliche an oberster Stell, mer sind wie e grossi Familie und das springt ufs Publikum übere. Mer freue eus, dass mir immer wieder d Lüüt mit euse Kläng chöne mitrisse und in Partystimmig versetze und hoffe, dass es no laaaang so wiiter goht!
